Isa 62 | NdeIBE | STEP | Ngenxa yeZiyoni angiyikuthula; ngenxa yeJerusalema angiyikuhlala ngithule, ukulunga kwayo kuze kukhanye njengokusa, ukusindiswa kwayo kuze kukhanye njengezibane ezivuthayo.

Isaiah 62

Ibizo Elitsha leZiyoni

1 Ngenxa yeZiyoni angiyikuthula; ngenxa yeJerusalema angiyikuhlala ngithule, ukulunga kwayo kuze kukhanye njengokusa, ukusindiswa kwayo kuze kukhanye njengezibane ezivuthayo.

2 Izizwe zizakubona ukulunga kwakho lamakhosi wonke ayibone inkazimulo yakho. Uzabizwa ngebizo elitsha umlomo kaJehova ozakunika lona.

3 Uzakuba ngumqhele wenkazimulo esandleni sikaJehova, umqhele wobukhosi esandleni sikaNkulunkulu wakho.

4 Kabasayikukubiza ngokuthi oTshiyiweyo kumbe babize ilizwe lakho ngokuthi Chithakele. Kodwa uzabizwa ngokuthi Hefiziba ilizwe lakho kuthiwe yiBhewula, ngoba uJehova uzathokoza ngawe, lelizwe lakho lizakwenda.

5 Njengejaha lithatha intombi, ngokunjalo amadodana akho azakuthatha; lanjengomyeni ethokozela umakoti wakhe, ngokunjalo uNkulunkulu uzathokoza ngawe.

6 Ngibeke abalindi phezu kwemiduli yakho wena Jerusalema; kabayikuthula lanini emini loba ebusuku. Lina elimbizayo uJehova, musani ukuphumula,

7 laye lingamphumuzi aze akhe iJerusalema alenze libe lodumo emhlabeni.

8 UJehova ufungile ngesandla sakhe sokudla langengalo yakhe elamandla wathi; “Angiyikuphinda lanini ukunika izitha zenu amabele enu njengokudla kwazo, njalo lanini abezizwe kabayikuphinda banathe iwayini elitsha elilisebenzele nzima.

9 Kodwa labo abawavunayo bazawadla badumise uJehova, lalabo ababutha amavini bazalinatha emagumeni endlu yami engcwele.”

10 Dlulani, dlulani emasangweni! lungiselani abantu indlela. Candani, candani umgwaqo! Susani amatshe. Phakamiselani izizwe uphawu.

11 UJehova usenze isimemezelo emhlabeni wonke wathi; “Tshonini kuyo iNdodakazi yaseZiyoni lithi, ‘Khangela uMsilisi wakho uyeza! Khangela umvuzo wakhe ulawo, lenhlawulo yakhe ulayo.’ ”

12 Bazabizwa ngokuthi ngaBantu abaNgcwele, abaHlengiweyo bakaJehova; wena uzathiwa Ofunwayo, iDolobho Elingasatshiywanga.